كان المفروض أكتب الكلام دا من مده بس طبعا في ظل الظروف اللى حصلت في بداية 2011 ماكنش عندي وقت ولا صفاء ذهن كافي عشان أكتب..
لاحظت إن كل الناس تقريبا كتبت عن حصاد 2010 -السنه اللي تعد من أغرب سنين حياتي- حاولت أعمل كده أنا كمان لكن معرفتش لأن ببساطه "هند" اللي استقبلت عام 2010 غير "هند" اللي انهته تمام.. أنا أتغريت تغيير تقريبا جذري في السنه دي ومش فاكره أو مش عايزه أفتكر إحساسي كان إزاي والسنه بتبدأ وللأسف بردو هحاول أنسى إحساسي وهي بتنتهي..
أنا يمكن مش هكتب أحداث على أد ما هي مشاعر ومحطات حصلتلي في 2010
شهر يناير : إمتحانات النساء والتوليد وشيماء والشيبسي :
في الشهر دا كنت لسه ماخلصتش دراسه وزي الأيام دي كنت محبوسه في أوضتي مع شيماء صاحبتي -اللي كانت كل يوم وهي جايه تجيبلي معاها شيبسي وبيبسي وشكولاته والذي منه لزوم المذاكره-
فاكره جدااا إحساسي يوم رأس السنه كان كل قرايبي في اسكندريه بيحتفلوا وسهرانين للصبح وأنا قاعده منكبه على الكتب وكان كل مايجيلي رسالة تهنئه برأس السنه أعيط كان إحساس رخم أوي..وبرغم كل دا دخلت الإمتحان ونجحت وجبت تقدير كمان
*خلاصة مشاعر الشهر دا : إكتئاب وحزن وزهق شديد وكوابيس من المذاكره ووحده
شهر فبراير ومارس : حملة البرادعي وخالتي وخالتك واتفرقوا الخالات :
طبعا أنا كنت متابعه موضوع د.البرادعي من زمان لكن ماعرفتش أدخل الحمله قبل شهر فبراير عشان الدراسه.. وطبعا زيي زي كل الناس كنت متحمسه جدا جدا للموضوع بس أنا كنت متحمسه لفكرة تغيير الدستور والحراك السياسي اللي كان حاصل ورد فعل الناس..وكنت متحمسه أكتر للناس اللي أتعرفت عليهم من الحمله واللى فيهم ناس لحد دلوقتى من أعز أصحابي..لكن عمري ماتخيلت إن التغيير هايجي بالطريقه دي ولا كان عندي أمل إن د.البرادعي هيترشح للرئاسه ويكسب والبلد حالها يتصلح لأني عارفه كويس إن الحياه مش بسيطه أوي كده..وكنت بحس إن مشكلة أغلب الناس في الحمله إنهم كانوا محسسني إنهم عايشين في مسلسل عربي كل حاجه فيه هتتحل في أخر حلقه ودا طبعا اللي كلهم أدركوا دلوقتي أنه كان غلط.
الفتره دي طلعت بصديقي الصغنن "شلبي" واللي أنا مصره إن إحساسي ناحيته إبني مش صديقي
* خلاصة مشاعر الشهرين دول : حماس وإنبهار وسذاجه وبداية تمرد.
شهر إبريل ومايو : والمعهد المصري الديموقراطي .. وخناقات كتييييييييير في البيت
في شهر إبريل ابتدى التمرد الحقيقي ليا وفي الأول كنت بتخانق بسبب ومن غير سبب..شغلي اللي أنا مش حاباه وإحساسي بالظلم إني من الأول دخلت كليه مش بحبها ومطلوب مني أمارس مهنه عمري ما هقدر أتميز فيها طول ما أنا كارهها كده..وفي الشهر دا بدأت فكرة الإستقلال تسيطر عليا وتكبر في دماغي..
أما شهر مايو فأشهر محطه فيه إني كنت أول مره أروح المعهد المصري الديموقراطي اللي منه أتعرفت على ناس كتير هما أعز أصحابي دلوقتي
في الشهرين دول أتعرفت على "تامر عبد الوهاب" صديقي الصدوق..صحيح احنا بنتخانق في الدقيقه 60 مره :)
لكن تامر بجد من أحسن الناس اللي عرفتهم ومن أقرب الناس ليا وهيفضل صديقي العزيز دايما
واتعرفت كمان على"إسراء عبد الفتاح" وهي دلوقتي من أكتر الناس اللي بحبهم وبكل طيبتها وتلقائيتها وحماسها وتفانيها وحبها الشديد لشغلها
واتعرفت على الشاب المفكر "باسم فتحي" اللي كنت مفكراه في الأول بيسرح دايما عشان هو طبعه كده واكتشفت مع الوقت انه بيسرح دايما لأن دايما في حاجه مهمه شاغلاه ولو مفيش هو بيعرف يوجدها..ورغم انشغاله الدائم الا انه صاحب جدع بجد
ومن الناس بردو اللي طلعت بيهم في الشهرين دول "محمود مكادي" اللي كان ولازال من أعز أصحابي
*خلاصة مشاعر الشهرين دول : كبت وعصبيه وإحساس سخيف بالفشل بس كان معاهم سعاده بالناس اللى عرفتها
شهر يونيو ويوليو : الحريه الفرديه وباسم سمير وعيد ميلادي :
في شهر يوليو بالذات كنت بدأت أهدأ كتير وأحاول أعيش على أرض الواقع أكتر وأحط خطه لحياتي ويعد من الشهور الجميله لأني عرفت فيه ناس من أحسن الناس اللى هما "ندى عزيز وإسراء نوح وبدوي " دول دلوقتي تقريبا أعز أصحابي اللي بحبهم جدا بجد
وطبعا دا الشهر العظيم اللي أتعرفت فيه على ملك الحرية الفرديه "باسم سمير" اللي أنا بعتبره الأب الروحي ليا يكفي أنه أول من وجه أهتمامتي ناحية حقوق الإنسان اللي يعد من أكتر الحاجات اللي شدتني جدا وعندي شغف كبير جدا إنى أقرأ وأدرس فيها أكتر..وبسببه أتغيرت نظرتي للأمور في حاجات كتير..وباسم بجد بشهدله أنه أول مصري ليبرالي أعرفه فاهم بجد يعني ايه ليبراليه..
وأتعرفت كمان في الشهر دا على أكتر شخصيه إنسانيه قابلتها في حياتي "عمرو صلاح" بجد إنسان نقي بشكل مبالغ فيه ماكنتش مصدقه إن في شخص زيه كده في الدنيا..
أما عيد ميلادي بقى فاملوش لزمه أقول أنه كان من أسوء أعياد الميلاد اللي مرت عليا في حياتي
*خلاصة مشاعر الشهرين دول : إحساس بالسعاده وإن في أمل وأني مش لوحدي في الدنيا
شهر أغسطس وسبتمبر : هسافر فرنسا وأحلام يقظه كتير كده ولا حاجه منها حصلت :
حاولت أسافر فرنسا في الفتره دي عشان أشوف إمكانية إني أكمل دراسه هناك لكن ماعرفتش لأن ورقي ماكنش كامل زي ما بيقولوا أو يمكن دا السبب الشيك اللي بيقولوه ومش عايزين يصدمونا بالحقيقه ويقولولنا إن إحنا بني آدمين درجه تانيه أو تالته كمان وهما مش عايزنا في بلدهم وبصراحه محدش يقدر يلومهم على تفكيرهم دا..
بس ميزه شهر سبتمبر إني أتعرفت على "سلمى" صحبتي وحبيبتي ونفسي نفضل أصحاب دايما وأغلب الوقت بردو بحس إنها بنتي مش صحبتي
وكمان طلعلي معرفش منين "عبد المنعم إمام" صديقي اللمض جدا :)))
لا بجد منعم من أكتر الناس اللي بعتز بيها وبحبها وكفايه انه من أبناء بلدي وساعدني كتير إني أفهم نفسي أكتر
* خلاصة مشاعر الشهرين دول : صدام بالحياه الواقعيه وشويه حزن وإحباط
شهر أكتوبر ونوفمبر : وبالذات نوفمبر :
الشهرين دول يمكن ماكنش فيهم أحداث كتيره لكن كان فيهم مشاعر كتير وشهر نوفمبر كان فيه نقطة تحول في حياتي وصلت لنقطه معينه وقدرت أعمل تصالح مع نفسي وأوصل لدرجه من السلام الداخلي..أتغيرت شخصيتي أوي في الشهرين دول وأخدت قرارات حاسمه في أمور كتير..
وأتعرفت في الفتره دي على صديقي "أحمد عيد" بجد شخصيه ملائكيه فعلا ماتصدقش انه موجود إلا لما تشوفه وتتكلم معاه
وأتعرفت كمان على "ماجد ماهر" صديقي العزيز جدا اللي إرتحتله جدا يمكن من تاني دقيقه قعدت معاه فيها وأكتشفت أد ايه هو إنسان طيب
* خلاصة مشاعر الشهرين دول : مممممممم بصراحه مش عارفه
وأخيرااااا شهر ديسمبر : حاجات حلو كتير وناس أحلى كتير كتير :
الشهر دا كان أجمل شهر مر عليا بجد .. أحساس بإقبال على الحياه وثقه أكبر بالنفس .. وبطلت فيه أضغط على نفسي كتير في تعاملاتي مع ناس مش عايزه اتعامل معاهم..
والشهر دا كان ميزته إني قربت أكتر من أصحابي "ندى وإسراء نوح وإسراء عبد الفتاح وسلمى"..وأتعرفت على ناس من أحسن الناس بجد "ماريان ونانا سامي وسلام " اللي حبيتهم أوي ونفسي أتعرف عليهم أكتر وحاسه اننا هنبقى أصحاب جدااا..ونفسي كل الشهور اللي جايه في 2011 تبقى تكمله لشهر ديسمبر اللي أنا شايفاه كان جميل بجد
*خلاصة مشاعري في الشهر دا: سعيده أغلب الوقت بس أصحابي بيوحشوني جدا وحاجات صغيره أوي بتضايقنى
طبعا السنه كان ممكن تقفل على كده وكانت هتبقى بجد بداية 2011 مشجعه جدا لولا الغم اللى حصل في أول ساعه من أول يوم في السنه
بجد منه لله اللي كان السبب
ليست هناك تعليقات:
إرسال تعليق